Dane Paulus Sareng Dane Silas Ngortiang Orti Rahayu ring Kota Tesalonika
17
Dane Paulus sareng dane Silas nglanturang pamargin danene ngliwatin Kota Ampipolis lan Kota Apolonia raris rauh ring Kota Tesalonika.
Ring kotane punika,
wenten bale wantilan agama Yahudine.
2 Sekadi biasane dane Paulus ngranjing ka bale wantilane.
Tigang rahina Sabat,
dane neren mabligbagan indik Cakepan Suci sareng para anake sane wenten irika.
3 Dane nerangang tur muktiang indik Sang Prabu Sane Kajanjiang olih Sang Hyang Pengardi punika musti sengsara tur padem.
Raris Ida maurip malih sekadi jati mula saking anake padem.
Dane Paulus mabaos sapuniki,
“Sang Hyang Yesus sane ortiang tiang kapining ragane punika nenten tios Sang Prabu Sane Kajanjiang olih Sang Hyang Pengardi.”
4 Mirengin baos dane Pauluse,
wenten makudang anak Yahudi dados pracaya raris nyarengin dane Paulus lan dane Silas.
Kenten pada akeh anak nenten Yahudi sane bakti kapining Sang Hyang Pengardi taler anak istri-istri sane kaajiang ring kotane punika dados pracaya kapining Sang Hyang Yesus.
5 Nanging para anak Yahudine dados iri ati.
Raris ipun sami munduhang para anake sane mayus wiadin jaat sane pasliwer ring pasare mangda dados grombolan.
Turmaning grombolane makarya paindikan sane biyut ring kotane punika.
Salanturnyane ipun sami ngrejeg jeron dane Yason.
Ipun sami mrika jagi ngrereh dane Paulus lan dane Silas mangdane kabakta ka arepan wargane irika.
6 Nanging tatkala ipun sami nenten manggihin dane sareng kalih,
ipun sami maid dane Yason lan makudang anak pracaya sane lianan ka arepan para pengede kotane punika.
Irika ipun sami majeritan keras sapuniki,
“Anake sane maideh-idehan makarya paindikan biyut ring saluirin genah sampun rauh ring kotane puniki.
7 Tur Yason sampun nerima ipun sareng kalih ring umahnyane.
Kenten pada,
ipun sami nungkasin prentah-prentah kaisar Romane.
Ipun ngamaosang yening wenten raja sane lianan sane mapesengan Yesus.”
8 Mirengin baose punika,
anake akeh lan para pengede ring kotane punika pada inguh.
9 Irika raris para pengede kotane nunden dane Yason lan para anake pracaya punika mangda naur jaminan.
Raris ipun sami kabebasang.
Dane Paulus Sareng Dane Silas ring Kota Berea
10 Duk dina wengi,
para anak sane pracaya ring kotane punika nunden dane Paulus lan dane Silas luas ka Kota Berea.
Sasampune rauh irika,
dane raris luas ka bale wantilan agama Yahudine.
11 Para anak Yahudine sane wenten ring Kota Berea lebih dame manahnyane bandingang kapining anak Yahudi sane wenten ring Kota Tesalonika.
Ipun sami seneng pisan nerima pengajahan indik Sang Hyang Yesus.
Tur sebilang dina ipun sami seleg malajahin Cakepan Sucine mangdane sujati uning napike yakti pengajahan dane Paulus lan dane Silas punika.
12 Punika mawinan,
akeh anake irika dados pracaya kapining Sang Hyang Yesus.
Kenten pada wenten akeh anak Yunani lanang wiadin istri sane kaajiang dados pracaya.
13 Duk punika para anak Yahudi ring Kota Tesalonika mirengin indik dane Paulus ngortiang pengajahan saking Sang Hyang Pengardi ring Kota Berea.
Para anak Yahudine punika pada rauh mrika jagi manes-manesin anake irika saha ngranayang manah anake inguh.
14 Punika mawinan para semeton sane wenten ring Kota Berea gelis-gelis ngatehang dane Paulus luas nuju ka segara.
Nanging dane Silas sareng dane Timotius kari meneng ring Kota Berea.
15 Raris para semetone punika ngatehang dane Paulus luas kantos ka Kota Atena.
Sasampune kenten,
para semetone punika mawali ka Berea saha makta pabesen saking dane Paulus mangdane dane Silas lan dane Timotius gelis-gelis ngrauhin dane.
Dane Paulus ring Kota Atena
16 Risedek dane Paulus nyantosang dane Silas lan dane Timotius ring Kota Atena,
manah danene sebet lan grimutan krana nyingakin akeh wenten togog-togog para dewa ring kotane punika.
17 Punika mawinan dane Paulus mabligbagan ring bale wantilan agama Yahudine indik Sang Hyang Yesus sareng para anak Yahudine lan anak lianan sane mabakti kapining Sang Hyang Pengardi.
Kenten pada sebilang dina ring pasar,
dane mabligbagan sareng anake sane wenten irika.
18 Irika taler wenten guru-guru soroh Epikuros miwah soroh Stoaa majulat raos sareng dane Paulus.
Wenten saking para gurune punika mabaos sapuniki,
“Apake orahanga anake ene?
Liu munyine sakewala sing maarti apa!”
Wenten pada anak lianan mabaos sapuniki,
“Mirib ia nyeritayang unduk para dewa bangsa lenan.”
Ipun mabaos sekadi punika krana dane Paulus ngortiang Orti Rahayu indik Sang Hyang Yesus lan indik Ida maurip malih sekadi jati mula.
19 Raris ipun sami ngajak dane Paulus ring pasangkepan Areopagusb.
Irika raris ipun sami mabaos sapuniki,
“Tiang sami meled uning pengajahan anyar sane ortiang jerone punika.
20 Duaning jerone ngamaosang paindikan sane soleh pirengin tiang.
Punika mawinan,
tiang sami meled uning napike artin pengajahane punika.”
21 Santukan makasami anake ring Atena,
inggih punika warga asli kotane punika sareng warga tamiu biasane ngutang pakaryane buat mirengin lan mababaosan paindikan-paindikan sane anyar.
22 Raris dane Paulus ngadeg ring arepan anake akeh sane mapunduh ring pasangkepan Areopaguse tur mabaos sapuniki,
“Duh para warga Atena!
Titiang nyingakin jerone anteng pisan nyungsung dewa-dewa ring sekancan parilaksanan jerone.
23 Krana ritatkala titiang mamargi ngiterin kotan jerone puniki,
titiang nyingakin genah-genah jerone mabakti.
Duk punika titiang nyingak pada wenten asiki tugu sane madaging tulisan sapuniki,
‘Majeng ring sasembahan sane nenten kauningin.’
Nah sane mangkin,
titiang ngortiang indik sasembahan sane nenten uningin jerone punika.
24 “Sang Hyang Pengardi sane ngardi jagat lan sekancan dagingnyane.
Ida punika Maha Kuasa ring langit miwah jagate.
Ida nenten meneng ring genah-genah mabakti sane kakaryanin olih manusa.
25 Turmaning Ida nenten ngamerluang pitulungan saking manusa krana Ida sane ngicen urip miwah angkihan tur sekancan paindikan ring manusane sami.
26 Pengawitne Ida ngardi manusa adiri.
Raris saking manusane punika,
Ida ngardi saluirin soroh bangsa-bangsa mangdane manusane meneng ring saluirin jagate puniki.
Kenten pada,
saking pengawitne Ida sane mastiang galah bangsa-bangsane punika maurip turmaning ring dija ipun sami jagi meneng.
27 Sang Hyang Pengardi malaksana sekadi punika mangda manusane ngrereh Ida.
Minab manusane sami magabag-gabagan ngrereh Ida tur manggihin Ida.
Nanging sujatine Ida nenten ja adoh saking iraga suang-suang.
28 Krana iraga maurip,
makrisikan,
miwah wenten ring jagate krana kuasan Ida.
Kenten pada para anake sane nyastra ngamaosang sapuniki,
‘Iraga makasami putra lan putrin Sang Hyang Pengardi.’
29 “Nah sane mangkin,
krana iraga dados para putran Sang Hyang Pengardi,
nenten pantes yening iraga matehang kawentenan Idane sareng togog sane malakar aji emas,
perak,
wiadin batu sane kaukir manut kawikanan manusa.
30 Idumun,
Sang Hyang Pengardi nenten ngukum manusane sane nenten uning pikayunan Idane.
Nanging mangkin Ida mrentahang saluirin manusane ring jagate mangda masalin saking urip sane madosa.
31 Krana Sang Hyang Pengardi sampun mastiang indik dinane Ida jagi ngadilin manusane antuk pengadilan sane adil.
Ida taler sampun netepang Anak adiri mangda nglaksanayang pengadilane punika.
Ida sampun muktiang paindikane punika ring anake sami malantaran nguripang Anake punika saking anake padem.”
32 Ritatkala anake ring pasangkepane punika mirengin indik anake sampun padem kauripang malih,
wenten saking anake akeh punika ngedekin dane Paulus.
Nanging wenten sane lianan mabaos sapuniki,
“Ring galahe sane lianan,
tiang sami meled mirengin jerone malih indike punika.”
33 Raris dane Paulus luas ngalain ipun sami.
34 Nanging saking anake sami punika wenten makudang anak sane nugtug dane Paulus tur pracaya kapining Sang Hyang Yesus.
Salah tunggal anak lanang sane pracaya mapesengan Dionisius,
inggih punika anak saking pasangkepan Areopagus.
Wenten pada anak istri sane mapesengan Damaris tur makudang anak lianan sane pracaya.